ஆடிப்பாடி மகிழுவோம்

பூமியில் பாவங்கள் பெருக்கிற்று
புனிதங்கள் அதனோடு ஒழிந்திற்று
பாதாளம் விரைவாய் எழுவதற்குள்
பாலகன் இயேசுவே அவதரித்தார்

அகிலத்தை ஜனிப்பித்தவர்
தொழுவத்தில் ஜனனித்தார்
எளிமையின் புனிதத்தை
எல்லோருக்கும் சமர்ப்பித்தார்

மாநுடத்தாயில் கருவில்
மகத்துவதேவன் வந்துதித்தார்
தன்னுயிரை ஈந்திட தரணியில்
தாழ்மையின் தனயனாய் வெளிப்பட்டார்

வழியும் சத்தியமும் ஜீவனுமாய்
உலகுக்கு அன்பான குருவானார்
அழிவின் பாதையை உணர்த்திட‌
அவரே கருவில் உருவானார்...


ஆடிப்பாடி மகிழுவோம்
ஆனந்தத்திருநாளை கொண்டாடுவோம்
ஆண்டவர் இயேசுவின் அன்பதின்
ஆற்றலை நாமும் பெற்றிடுவோம்


நல்ல தீர்மானங்கள் கொண்டிடுவோம்
நாளும் அதனுடன் வளர்ந்திடுவோம்
உலக இன்பங்கள் வெறுத்திடுவோம்
உன்னத நிலையதில் நடந்திடுவோம்!!


(19.12.2012 அன்று பிரசுரமானது)