துருவ நட்சத்திரமாக மலேசிய பெண்படைப்பாளி கே.எஸ்.செண்பா அவர்களின் நேர்காணல்

பெண் படைப்பாளிகள் அனுபவங்களை எழுத்தில் வடிக்கிறார்கள்: மலேசியா செண்பகவள்ளி http://www.thuruvam.com/2013/03/php_74.html

பெண்களின் புனைவுகளில் யதார்த்தமும், நேர்மையும் பண்பாட்டுக் கூறுகளும் மொழித் தூய்மையும் சிறப்பாகவே வெளிப்படுகின்றன எனக் கூறுகின்றார் மலேசிய இலக்கிய வரலாற்றில் புதுமையுடனும் புரட்சியுடனும் இலக்கியச் செயல்களையும் பல பொதுப்பணிகளையும் ஆற்றிக்கொண்டிருக்கும் பெண் படைப்பாளியான கே.எஸ். செண்பகவள்ளி.  அவரை துருவ நட்சத்திரம் பகுதிக்காக தொடர்பு கொண்டோம்.

காத்திரமான இல்லக்கியச் செயற்பாடுகளுடன் வலம்வரும் அவரின் முயற்சியே அவரை ஒரு சாதனைக்குரிய பெண்மணியாக நம்மத்தியில் இனம்காட்டியுள்ளது. மலேசியாவில் தகவல், தொடர்பு, பண்பாட்டு அமைச்சில் சிறப்பதிகாரியாக பணியாற்றிக் கொண்டிருக்கும் அவர் தன்னுடைய நேரச்சிக்கலுக்கும் மத்தியில் நம்முடன் சுவாரஸ்யமான விடயங்கள் பகிர்ந்துகொண்ட விடயங்களை துருவம் வாசகர்களுக்காக தருகின்றோம். 

கேள்வி: மலேசியாவில் வசித்துவரும் நீங்கள், உங்களைப் பற்றிய அறிமுகத்தை இலங்கை மக்களுக்காகவும் துருவம் வாசகர்களுக்காகவும் பகிர்ந்துகொள்ளுங்கள்?

பதில்: வணக்கம். நான் மலேசியாவில் ‘சுங்கை சிப்புட்’ என்னும் இடத்தில் பிறந்து வளர்ந்தேன். என்னுடன் பிறந்தவர் எண்மர். தந்தை மறைந்துவிட்டார். தாயார் என்னோடு வசிக்கின்றார். உடன் பிறந்த அனைவரும் நல்ல துறைகளில் பணியாற்றி வருகின்றோம். தற்சமயம் பணி நிமித்தமாக மலேசியாவின் தலைநகர் கோலாலம்பூரில் வசித்து வருகிறேன்.

கேள்வி: இலக்கியத்தில் உங்களுக்கான ஈடுபாடு எவ்வாறு ஏற்பட்டது? அதன் பிரவேசம் பற்றியும் இதுவரை நீங்கள் படைத்த எழுத்தாக்கங்கள் பற்றியும் கூறுங்களேன்?

பதில்: கடந்த 25 வருடங்களாக எழுத்துத்துறையில் ஈடுபட்டு வருகிறேன். சிறிய வயதாக இருக்கும்போதே இலக்கிய ஆர்வம் என்னுள் வேரூன்றியது. காரணம் என் குடும்பத்தில் நிலவிய தமிழ்ச் சூழல். என் தந்தைதான் எனது ஆசான். பள்ளியில் தடம் பதிக்கும் முன்னே திருக்குறள், ஆத்திச்சூடிச் சொல்லித் தந்தவர். என்னுள் தமிழ்த் தாகத்தை ஏற்படுத்தியவர். அதன் வெளிப்பாடுதான் இன்று உங்கள் முன்னிலையில் நான் அறிமுகப்படுத்திக்கொள்ள பாலமாக அமைந்தது. 

எழுத்துத்துறைப் பிரவேசத்திற்குக் காரணம் என் தமக்கை. நான் சிறிய வயதாக இருக்கும்போது மாணவர்களுக்காக சிறுவர் கதை, மர்மக்கதை எழுதி வந்தார். அதைப் படிக்கும்போது ஏற்பட்ட ஆர்வம் என்னையும் எழுதத் தூண்டியது. எனது 13ஆவது வயதில் ‘மரம்’ என்ற தலைப்பில் ஒரு கவிதை எழுதினேன். எங்கள் நாட்டில் வெளியாகிக் கொண்டிருக்கும் மூத்தப் பத்திரிகையான தமிழ்நேசன் நாளிதழில் அது வெளியானது. எனது முதலாவது சிறுகதை 17ஆவது வயதில் “கல்வியின் நிறம் என்ன?” என்ற தலைப்பில் அதே தமிழ்நேசன் நாளிதழின் 70ஆம் ஆண்டு மலரில் வெளியானது. எனது முதலாவது ஆய்வுக்கட்டுரை 2004ஆம் ஆண்டு ‘அரசியல் பயணத்தில் டத்தோஸ்ரீ சாமிவேலு’ என்ற தலைப்பில் எழுதி பரிசும் பெற்றேன். இம்மூன்று முதல் பதிவுகளும் எனது முத்திரைப் பதிவுகளாகும்.

நாட்டின் தேசத்தலைவர்கள், முக்கியமான நாட்களைக் குறித்து இதுவரை 60 ஆய்வுக் கட்டுரைகள் எழுதியுள்ளேன். தேசிய நில, நிதி கூட்டுறவுச் சங்கம், கிள்ளான் வாசகர் இலக்கியச் சோலை, மலேசியத் தமிழ் எழுத்தாளர் சங்கம், தமிழ்நேசன், மன்னன் மாத இதழ், சூரியன் மாத இதழ், மலேசியத் தேசியப் பழஞ்சுவடிக் காப்பகம், பொது இயக்கங்கள் போன்ற அமைப்புகள் வாயிலாக நடத்திய இலக்கியப் போட்டிகளில் பங்குகொண்டு சிறுகதை, கவிதை, கட்டுரை என அனைத்திலும் பல பரிசுகள் பெற்றுள்ளேன்.

தற்சமயம் நம்நாடு, தினக்குரல், மக்கள் ஓசை, தமிழ்நேசன், மலேசிய நண்பன், அன்பு இதயம், தமிழ் ஓவியம் போன்ற நாளிதழ் மற்றும் வார மாத இதழ்களில் சிறுகதை, கவிதை, கட்டுரைகளைப் எழுதி வருகிறேன். மலேசியத் தமிழ் எழுத்துலகம், தங்கமீன், திண்ணை ஆகிய இணையத்தளங்களிலும் படைப்புகளை எழுதியுள்ளேன்.

இதில் ‘அன்பு இதயம்’ என்னும் மாத இதழில் இரு ஆண்டுகளாகத் தொடர்ந்து ஆய்வுக் கட்டுரைகள் எழுதி வருகின்றேன். என் பதிவுகளுக்கு நல்ல தளம் அமைத்து பேராதரவு வழங்கி வருகின்றனர். எழுத்துறை வாயிலாக உலகரீதியில் எனது படைப்புகள் கவனிக்கப்படுகின்றன.

2012ஆம் ஆண்டு மலேசியத் தொலைக்காட்சியில் “வசந்தம்” என்னும் நிகழ்ச்சியில் எனது பணி தொடர்பான ஒரு மணி நேர நேர்க்காணல், மலேசிய வானொலியான மின்னல் பண்பலையில் ஒரு மணிநேர நேர்க்காணல், மீண்டும் இவ்வருடம் உலக மகளிர் தினத்தையொட்டி “வசந்தம்” நிகழ்ச்சியில் ஒரு மணிநேர நேர்க்காணல், கடந்த 2012ஆம் ஆண்டு ஆகஸ்ட் மாதம் லண்டன் தமிழ் வானொலியில் ஒரு மணிநேர நேர்க்காணல், கடந்த பெப்ரவரி 14-15ஆம் திகதிகளில் சென்னையில் நடைபெற்ற உலக தமிழாராய்ச்சி மாநாட்டின் தேசியக் கருத்தரங்கில் “அயல்நாட்டு தமிழ் இலக்கியங்கள்” என்ற தலைப்பில் நடைபெற்ற அமர்வில் முனைவர் பா.த கிங்ஸ்டன் எனது கவிதைகளை ஆய்வுச் செய்து “புலம்பெயர் இலக்கியங்கள் பார்வையில் மலேசியக் கவிஞர் கே.எஸ்.செண்பகவள்ளி” என்ற தலைப்பினில் கட்டுரை சமர்ப்பித்துள்ளேன். இவையனைத்தும் எனக்குக் கிடைத்த சமூக அங்கீகாரமாகவே கருதுகிறேன்.

கேள்வி: உங்களால் தொழிலையும், இலக்கியப் பணியையும் எவ்வாறு செய்ய முடிகிறது?

பதில்: நான் கடந்த 6 வருடங்களாக மலேசியத் தேசியப் பழஞ்சுவடிக் காப்பகத்தில் ஆய்வாளராகப் பணியாற்றினேன். தற்சமயம் மலேசிய அரசாங்கத்தின் தகவல், தொடர்பு, பண்பாடு அமைச்சின் துணையமைச்சர் அலுவலகத்தில் சிறப்பதிகாரியாக பணியாற்றுகிறேன். வேலை தவிர்த்து பொதுச்சேவையில் ஈடுபட்டு வருகிறேன்.

தற்சமயம் மலேசியத் தமிழ் எழுத்தாளர் சங்கத்தின் துணைச் செயலாளராகவும், சுங்கை சிப்புட் இந்தியர் இயக்கத்தின் துணைச் செயலாளராகவும் செயலாற்றி வருகிறேன். சுங்கை சிப்புட் அமைப்பின் வாயிலாக சேவைகள் பலவற்றைச் செய்து வருகிறோம். நலிந்தோருக்கு உதவுதல், கல்வி, விளையாட்டு, இலக்கியம் தொடர்பாக பல நிகழ்ச்சிகளையும் செய்து வருகிறோம்.

மேலும் சுங்கை சிப்புட் வாசகர் இயக்கத்தின் தலைவியாகவும் பொறுப்பேற்றுள்ளேன். 2007ஆம் ஆண்டிலிருந்து 2010ஆம் ஆண்டுவரை அரசியலில் பிரசவேசித்திருந்தேன். இன்றும் இது போன்ற அரசியல், சமூகம், இலக்கியம் ஆகிய அமைப்புகளில் பங்காற்றி வருகிறேன்.

கேள்வி: உங்களுக்கு இலங்கையுடன் இலக்கியத் தொடர்புகள் எவ்வாறு காணப்படுகிறது?

பதில்: இலங்கை இன்று உலக மக்களின் பார்வையில் உள்ள நாடு. ஆனால், இலங்கையுடனான என் இலக்கியத் தொடர்பு மிகவும் ஆரோக்கியமானது. இலங்கைவாழ் இலக்கிய ஆர்வலர்களின் தொடர்பு முகநூல் வாயிலாகதான் எனக்குக் கிட்டியது. என் முதல் இலங்கை நண்பர் கவிஞர் அஸ்மின். மிகவும் நல்ல மனிதர். அவர் வாயிலாக சகோதரி ‘கலைமகள்’ ஹிதாயா ரிஸ்வியின் நட்பு கிடைத்தது. இவர்கள் இருவர் மூலமாக பல இலக்கிய ஆர்வலர்கள் எனக்கு அறிமுகமானார்கள். இதனால் நல்ல நட்பு வட்டங்களைப் பெற்றிருக்கிறேன். அண்மையில் “தடாகம்” கலை, இலக்கிய வட்டத்தின் மலேசியா இணைப்பாளர் என்ற அங்கீகாரம் கிடைத்தது, இது மென்மேலும் இலக்கிய உறவுவினை வலுப்படுத்துகிறது என்பதில் மகிழ்ச்சியடைகிறேன்.

கேள்வி: நீங்கள் கலந்து சிறப்பித்த இலக்கிய மாநாடுகள் தொடர்பாகவும் வெளிநாட்டு அனுபவங்களையும் எம்முடன் பகிர்ந்து கொள்ளுங்கள்?

பதில்: மலேசியாவில் பல இலக்கிய மாநாடுகளில் கலந்துள்ளேன். நான் கலந்து கொண்ட முதல் வெளிநாட்டு மாநாடு மலேசியத் தமிழ் எழுத்தாளர் சங்கத்துடன் 2010ஆம் ஆண்டு கோவையில் நடைபெற்ற உலகத் தமிழ்ச் செம்மொழி மாநாடு. என் வாழ்க்கையில் மறக்க முடியாத மாநாடு. காரணம் அம்மாநாட்டின் போது உலகளாவிய நிலையில் அறிஞர்கள், இலக்கியவாதிகள், எழுத்தாளர்கள் என பலரை நேரடியாக சந்திக்க முடிந்தது.

அடுத்து மலேசியாவில் நடந்த உலக இஸ்லாமிய தமிழ் இலக்கிய மாநாடு. இங்கும் பல நட்புள்ளங்களைச் சந்திக்க முடிந்தது. குறிப்பாக கவிக்கோ அப்துல் ரஹ்மான், ஐயா சாகும் அமீது, கவிஞர் நஜ்முல், கவிஞர் அஸ்மின், சிங்கப்பூர் அறிஞர் ஹிமானா சயிட் இவ்வாறாக பலரை நேரில் கண்டேன்.

தொடர்ந்து மாநாடு என்றில்லாமல் கருத்தரங்கில் பங்குக் கொள்ளும் வாய்ப்பினை ஏற்படுத்தித் தந்தது மலேசியத் தமிழ் எழுத்தாளர் சங்கம். அவ்வகையில் கடந்த ஆண்டு மார்ச் மாதம் முதன்முதலாக கொல்கத்தா தமிழ் மன்றத்தில் “மலேசியத் தேசியப் பழஞ்சுவடிக் காப்பகம் ஒரு வரலாற்றுக் களஞ்சியம்” என்ற தலைப்பில் என் முதல் கட்டுரைப் படைத்தேன். அதனையடுத்து கடந்த நவம்பர் மாதம் தஞ்சைத் தமிழ்ப் பல்கலைக்கழகத்தில் “மலேசியப் பெண் படைப்பாளர்களின் வளர்ச்சி ஒரு பார்வை” என்ற தலைப்பிலும் கட்டுரைப் படைத்துள்ளேன். இதைத் தவிர பல இலக்கிய கருத்தரங்குகளிலும் பங்குப் பெற்றுள்ளேன்.

இந்தியாவின் பல முக்கிய இடங்களுக்கு 2004ஆம் ஆண்டு தொடங்கி 2012ஆம் ஆண்டு வரை பயணம் மேற்கொண்டு வருகிறேன். நான் சென்ற ஒவ்வொரு இடமும் எனக்கு புதிய அனுபவமும், செய்திகளும், பாடங்களும் கிடைத்துள்ளன. 

கேள்வி: மலேசியாவில் இலக்கியத்துறையில் பெண்களின் பங்களிப்பும், ஆர்வமும் எவ்வாறு காணப்படுகின்றது? அவர்களை ஊக்கப்படுத்தும் களமாக விளங்கிக்கொண்டிருப்பது?

பதில்: இக்காலக்கட்டத்தில் மலேசியப் பெண் படைப்பாளர்கள் இலக்கிய வளர்ச்சிக்குப் பெரும் பங்காற்றி வருகின்றனர். காரணம் இன்று பெண்களுக்கு உயர்கல்வி பெறும் வாய்ப்பும் வளமும் பெருமளவில் வழங்கப்பட்டு வருகின்றன. ஆய்வுகளுக்காக எழுதத் தொடங்கியவர்கள், அத்துடன் நிறுத்தாமல் தொடர்ந்து பல படைப்புகளைப் படைப்பதில் முனைந்து ஆர்வம்காட்டி வருகின்றனர்.

‘இலக்கியம்’ என்பது தனி மனித அகவெழுச்சியாகும். அவ்வகையில் பெண் படைப்பாளர்கள் பெரும்பாலும் தங்கள் அனுபவங்களைத்தானே கற்பனையுடன் கலந்து கலைநயத்துடன் வெளிப்படுத்துகின்றனர். தங்களின் அனுபவங்களை எழுத்துக்களின் வழி படைப்புகளாகக் கொண்டு வருகின்றனர். பெண்களின் புனைவுகளில் யதார்த்தமும், நேர்மையும் பண்பாட்டுக் கூறுகளும் மொழித் தூய்மையும் சிறப்பாகவே வெளிப்படுகின்றன. தங்களின் மன உணர்வுகளை எழுத்தில் வடிக்கின்றனர்.

மலேசியப் பெண் படைப்பாளர்கள் சிறந்த முறையில் இலக்கியத்துறைக்கு வித்தாக அமைந்து வருகின்றனர் என்பதற்கு ஆதாரமாக மலேசியத் தமிழ் எழுத்தாளர் சங்கம், தேசிய நில நிதி கூட்டுறவுச் சங்கம், இன்னும் பிற சமூக அமைப்புக்களும், மன்றங்களும் பெண் படைப்பாளர்களுக்கு உரிய அங்கீகாரம் கொடுத்து, பொற்பதக்கம், கேடயம் ஆகியவைகளை வழங்கி சிறப்பித்து வருகின்றன.

கேள்வி: உங்களுடைய குடும்பமும் கலைத்துறை சார்ந்ததாக ஊடகங்கள் வாயிலாக அறிந்தோம். அதுபற்றி கூறமுடியுமா?

பதில்: நான் சிறிய வயதிலிருந்தே என் தந்தையின் கப்பீரமான குரல், தோற்றம் கண்டு பிரமித்து வளர்ந்தேன். அவர் முத்தமிழுக்கு முக்கியத்துவம் வழங்கியவர். நாடகத்துறையின் வாயிலாக கலைத்துறை வளர்ச்சிக்குக் உறுதுணையாக இருந்தவர். “முத்துக்குமரன் நாடகம் மன்றம்” அமைத்து சரித்திரம், இலக்கியம், சமூக நாடகங்களைப் பல மேடைகளில் அரங்கேற்றியவர் அவர்.

உடன் பிறந்த நாங்கள் எண்மரும் நாடகத்துறையில் பணியாற்றியுள்ளோம். நான் எனது 12ஆவது வயதில் பெருந்தலைச் சாத்தனாராக நடித்தேன். பிறகு செண்பக பாண்டியனாகவும் நடித்துள்ளேன். எனது சகோதர்களும் பல மேடை நாடகங்களில் நடித்துள்ளனர். அனைவருமே தமிழ் ஆர்வலர்கள். தந்தை மறைந்த காலத்தின் சுழற்சியின் காரணமாகவும், பணி நிமித்தமாகவும் எல்லோரும் ஒவ்வொரு திசையில் இருக்கிறோம். தந்தைவழி இலக்கியப் பணியை நான் மட்டும்தான் தொடர்ந்து வருகிறேன்.

கேள்வி: இலங்கையுடன் மலேசிய தமிழ்ச்சங்கம் தொடர்பினை கொண்டுள்ளதா? இங்கு நடைபெறும் மாநாடுகள், கருத்தரங்குகள் போன்வற்றில் அதன் பங்கு இருக்கின்றதா?

பதில்: மலேசியத் தமிழ்ச்சங்கங்கள், அரச சார்பற்ற பொது இயக்கங்கள் தனிப்பட்ட முறையில் இலங்கை தமிழ் அமைப்புடன் தொடர்பு கொண்டிருக்கின்றார்கள். ஆனால், அங்கு நடைபெறும் மாநாடுகளிலோ, கருத்தரங்குகளிலோ கலந்து கொள்வதில் விருப்பம் காட்டுவதில்லை. காரணம் இலங்கையில் தமிழ் மக்களுக்கு நடந்த அநீதிகள். இதனால், இலங்கையுடனான தொடர்பினை தள்ளியே நிற்கின்றோம்.

கேள்வி: உங்களது செயற்பாடுகளுக்கு கிடைத்த விருதுகள் மற்றும் பட்டங்கள் பற்றிக் குறிப்பிடுங்கள்?

பதில்: இலக்கியப் படைப்புகள் வாயிலாக பல பரிசுகள் பெற்றுள்ளேன். அவற்றில் மிகவும் குறிப்பிடத்தக்க விருதுகளாக

2005ஆம் ஆண்டு பெற்ற வாசகர் நற்பணி விருது, 2007ஆம் ஆண்டு பெற்ற சிறந்த சேவையாளர் விருது, 2012ஆம் ஆண்டின் இளையத் தலைமுறை சிறந்த கட்டுரையாளருக்கான ‘டான்ஸ்ரீ ஆதி நாகப்பன் விருது’ என்பவற்றைக் குறிப்பிடலாம்.

கேள்வி: சாதிக்கத் துடிக்கும் பெண்களுக்கு எடுத்துக்காட்டாகத் திகழும் உங்களது செயற்பாடுகளின் இரகசியம் என்ன? இப்பெண்களுக்கு நீங்கள் வழங்கும் ஆலோசனைகள் என்ன?

பதில்: எனது வெற்றியின் இரகசியம் எனது தன்னம்பிக்கைதான். என் மனதுக்கு சரி என்று பட்டதைச் செய்வேன், சொல்வேன். என் குடும்பம், நெருங்கிய நண்பர்கள் ஆதரவு தவிர்த்து நான் நம்புவது என் தன்னம்பிக்கையைதான்.

உலக வாழ்க்கையின் நுட்பங்கள் தேரவும்

ஓது பற்பல நூல்வகை கற்கவும்

இலகு சீருடை நாற்றிசை நாடுகள்

யாவுஞ் சென்று புதுமை கொணர்ந்திங்கே..!

என பாரதிக் கண்ட புதுமைப்பெண்களாய் என்றும் தன்னம்பிக்கையோடு செயல்பட்டால்

பெண்கள் தங்களுக்கான ஓர் அடையாளத்தை வளர்த்துக் கொள்ளலாம். 

இவ்வேளையில் “துருவம்” இணையத்தில் இந்த வாய்ப்பை வழங்கிய ஆசிரியருக்கும், ‘துருவம்’ குடும்பத்தினருக்கும் சகோதரி ராஜ் சுகாவுக்கும் மற்றும் இலங்கைவாழ் தமிழ் மக்கள் அனைவருக்கும் என் அன்பான வாழ்த்துக்களையும், நன்றியினையும் தெரிவித்துக் கொள்கிறேன்.

(நேர்காணல்: ராஜ் சுகா)

 0 64 0 66